வறுமையை வெல்ல ஜோதிட சூட்சுமங்கள்.

வாழ்க்கையில் வறுமையைக் குறிக்கும் கிரக சூழ்நிலைகள்.

வறுமை என்பது இல்லாதது, இயலாதது. இந்த இரண்டின் நிலையைத்தான் வறுமை என்கிறோம். உண்பதற்கு சரியான ருசியான உணவில்லை என்பதும், சரியான ருசியான உணவிருந்தும் சாப்பிட முடியாது என்பதற்கும் விளைவு ஒன்று தான். சாப்பாடு கிடையாது என்பது தான.

வறுமை என்பது பணம் இல்லாதது மட்டுமல்ல. பணத்தையும் தாண்டி, நியாயமாக கிடைக்க வேண்டிய எதுவெல்லாம் கிடைக்க வில்லையோ அதில்எல்லாம் நாம் வறுமையாக இருக்கிறோம் என்று பொருள். அதிகப்படியான நோய், நியாமான வருமானமின்மை, அடுத்தவர்களையே எப்பொழுதும் நம்பியிருத்தல் இப்படி எல்லாமே வறுமையின் அடையாளங்கள் தான்

இருந்தும் அனுபவிக்க முடியாதவனுக்கும் இல்லாமல் அனுபவிக்காமல் இருப்பவனுக்கும் ஜாதகத்தில் என்ன வித்தியாசம் இரு்க்கும்? புண்ணிய ஸ்தானமும் பாக்கியஸ்தானமும் நன்றாக இருந்தால் அவனால் அனுபவிக்க முடியும். இந்த இரண்டு பாவங்களும் கெட்டுப் போயிருந்து மற்ற பாவங்களின் மூலம் அவன் செல்வந்தராயிருந்தாலும் அவனால் அதனை அனுபவிக்க முடியாது.

இயலாதவர் மற்றும் இல்லாதவருடைய கிரக சூழ்நிலைகள் எப்படி இருக்கும். ?இராசிச் சக்கரத்தின் இலக்கிணாதிபதி, நவாம்சத்தில் இருக்கும் இடத்தின் அதிபதி இராசியில் இலக்கிணத்திற்கு 2, 7, 6, 8, 12 ம் இடங்களில் இருந்தால் வருமை ஏற்படும் என்று ஜோதிடம் கூறுகிறது..

இரண்டாம் இடத்தில் இருந்தால்

இரண்டாம் பாவ பலன்களான தனம் வாக்கு குடும்பம் இவற்றை இழந்தோ அல்லது மகிழ்ச்சியாக அனுபவிக்க முடியாத சூழல் உருவாகும்.

7ம் இடம், மனைவி, நண்பர்கள், இவர்களால் தொடர்ச்சியாக தொல்லைகள் ஏற்படும்.

6ம் இடம் இடைவிடாத நோயினாலும், வழக்கு, சண்டைகளாலும் அதிகப்படியான கடனாலும் நிம்மதியை இழக்க நேரிடும்.

எட்டாம் இடம், தொடர் விபத்து, ஆசைகள் இருந்தும் உடலோ மனமோ உடன் படாமல் வாழ்க்கையில் வெறுமையை உணர்தல்.

பன்னிரெண்டாம் இடம், எதை எடுத்தாலும் தோல்வி, நிம்மதியான உறக்கமின்மையால் அவதி போன்றவை ஏற்படும.

இதற்குத் தீர்வு என்ன?

வறுமை என்பது நிரந்தரமல்ல. யோகமான திசா புத்தி காலங்களில் கிடைக்கும் நல்ல சூழ்நிலைகளை பயன்படுத்திக் கொள்வது தான் வறுமையை ஒழிக்க ஒரே தீர்வு. அனைவருக்கும் யோக சூழ்நிலைகள் நிச்சயம் அமையும் அப்பொழுது பிரச்சனைகளுக்குரிய தீர்வுகள் கிடைக்கும் அல்லது பிரச்சனைகள் வரும் முன் காக்கக்கூடிய வழிமுறைகள் உருவாகும். அதை நல்ல முறையில் பயன்படுத்திக் கொள்ளவும்.



நன்றி.

ஜோதிடம் கூறும் மனித வாழ்க்கைக்கான யோகங்களும் தோசங்களும் .

மனித வாழ்க்கையில் நன்மையும் தீமையும் கலந்து தான் நடந்துகொண்டிருக்கிறது. இன்ப துன்பங்கள், சுக துக்கங்கள், வெற்றி தோல்விகள் இப்படி ஒன்றுக்கொன்று எதிரான இரண்டு செயல்கள் மூலம் தான் அனைவருடைய வாழ்க்கையும் சென்று கொண்டிருக்கிறது. முழு வாழ்க்கையிலும் நன்மையை மட்டுமே அனுபவித்தவர்களும் இல்லை, துன்பத்தை மட்டுமே எல்லா நாளும் அனுபவித்தவர்களும் இல்லை. இரண்டும் கலந்தது தான் வாழ்க்கை. ஆனால் எது எவ்வளவு காலம் நிலைத்திறுக்கும் என்பதும் எப்பொழுது அந்த நிலைமை மாறும் என்பதும் இறைவன் விதித்த கணக்கு. அதை முயற்சித்தால் தெரிந்து கொள்ள முடியுமே தவிர. மாற்ற முடியாது. இறைவனின் இந்த மொத்த கணக்கையும் இரண்டு வார்த்தைகளில் அடக்குவோமானால் அது தான் ஜோதிடம் கூறும் யோகங்களும் தோசங்களும்.

யோகங்கள் என்றால் என்ன?

யோகங்கள் என்பது நமக்கு விதிக்கப்பட்ட நல்வினைகள். அதாவது நாம் முற்பிறவியில் செய்த அல்லது இந்தப் பிறவியில் இதற்கு முன்பு வரை செய்த நல்ல வினைகளின் பலன்கள். நாம் எதையெல்லாம் மகிழ்ச்சியாகவும் திருப்பதியாகவும் அனுபவிக்கிறோமோ அதல்லாம் நமக்கு கிடைத்த யோகங்கள்.

தோசங்கள் என்றால் என்ன?

நாம் முற்பிறவியில் செய்த அல்லது இந்தப் பிறவியில் இதற்கு முன் செய்த தீவினைகளின் பலன். நமக்கு எதெல்லாம் கிடைக்கவில்லையோ எதையெல்லாம் நம்மால் திருப்தியாக அனுபவிக்க முடியவில்லையோ அதெல்லாம் தோசங்கள்.

இந்த யோகங்களையும் தோசங்களையும்  பணத்தைக் கொண்டோ அல்லது வேறு எந்த அளவீட்டு முறைகளைக் கொண்டோ அளக்க முடியாது. நம் மனம் மட்டுமே நம் இன்ப துன்பங்களை அளக்கும் அளவுகோல்.

யோகங்கள் தோசங்கள் எப்படி ஏற்படுகின்றன?

ஜோதிடத்தில் ஒவ்வொரு கோளும் ஒருசில காரண காரியங்களுக்கு பொறுப்பேற்கின்றன. அதே போல ஒவ்வொரு பாவமும் (வீடுகளும்) ஒருசில காரண காரியங்களுக்கு பொறுப்பேற்கின்றன. கோள்களும் பாவங்களும் (வீடுகளும்) தங்களுக்குள் நல்ல தொடர்பை பெறும் போது யோக நிலைகளையும் நல்ல தொடர்பு இல்லாத நிலையில் நிகழும்  தொடர்பு தோச நிகழ்வுகள் நிகழ்வதையும் எடுத்துக் காட்டுகின்றன.

அனைவரது ஜாதகத்திலும் குறைந்தபட்ச யோகங்களாவது கட்டாயம் இருக்கும். காரணம் ஒரு உயிர் மனிதப் பிறவி எடுப்பதற்கு என்றே சில புண்ணியங்களைச் செய்திருக்க வேண்டும் அப்படி செய்த புண்ணியங்களை இப்பிறவியில் அனுபவிக்க கடைமைப்பட்டிருப்பதால் அந்த யோகநிலைகளுடன் பிறக்கின்றனர். அதே போலத் தான் தோசங்களும். மனிதப் பிறவி என்பது மகத்தானது தான் இருந்தாலும் முற்பிறவியில் நாம் பண்ணிய பாவம் தான் நம்மை மீண்டும் பிறவி எடுக்க வைத்துள்ளது. அதனால் அனைவருக்கும் யோகங்களும் தோசங்களும் கலந்தே தான் இருக்கும்.

யோகங்களும் தோசங்களும் எப்பொழுது செயல்படும்?

அனைத்து யோகங்களும் அந்த யோகங்கள் தொடர்பு பெறும் கிரகங்கள் மற்றும் பாவங்களின் அதிபதிகள் திசை புத்தி அந்தரம் சூட்சுமம் உள்ள காலங்களில் செயல்படும். அது தவிர இராஜயோகங்கள் எல்லா காலங்களிலும் செயல்படும், பலன்கள் திசா புத்தி காலங்களில் அதிகம் கிடைக்கப் பெறுவார்கள்.

அனைவருக்கும் யோகங்கள் உண்டு என்றால் ஏன் ஒருவன் நல்லவனாகவும் ஒருவன் கெட்டவனாகவும் வாழ வேண்டும். பிச்சைக்காரர்களுக்கும், பைத்தியக்காரர்களுக்கும் கூடவா யோகங்கள் இருக்கும்?  அப்படி இருந்தால் ஏன் அவர்கள் அவ்வாறு இருக்கிறார்கள்?

உணருதல் தொடரும்.